Уладзімір Мацвеевіч Здановіч нарадзіўся 15 сакавіка 1959 г. у вёсцы Застаўе Драгічынскага раёна Брэсцкай вобласці. У шэсць гадоў пайшоў адразу ў другі клас, таму Бездзежскую сярэднюю школу закончыў у пятнаццаць гадоў, у дваццаць – факультэт радыёфізікі і электронікі Беларускага дзяржаўнага універсітэта імя У.І. Леніна. У 1979-1981 гг. – малодшы навуковы супрацоўнік кафедры электронных машын, інжынер БДУ.
З 1981 г. Уладзімір Здановіч настаўнічаў у Драгічынскім раёне – выхавальнік Бездзежскай сярэдняй школы, намеснік дырэктара Крамноўскай васьмігадовай школы (1981–1991), настаўнік фізікі Ліпніцкай васьмігадовай школы (1991–1992), Драгічынскай сярэдняй школы № 1 (1992–2000), дырэктар гімназіі ў Драгічыне (2000).
Па выніках конкурсу 1995 г. У. М. Здановіч прызнаны лепшым педагогам школ Беларусі. У 1996 г. яму было прысвоена ганаровае званне «Заслужаны настаўнік Рэспублікі Беларусь». Магістр педагогікі, сотні яго вучняў закончылі ВНУ, аўтар падручнікаў па фізіцы, многіх навуковых артыкулаў.
Пасля навучання ў Акадэміі кіравання пры Прэзідэнце Рэспублікі Беларусь У. М. Здановіч з’яўляецца менеджэрам сацыяльнай сферы. Неаднаразова выбіраўся дэпутатам у раённыя і абласныя Саветы дэпутатаў. Выбіраўся дэпутатам Палаты прадстаўнікоў Нацыянальнага сходу Рэспублікі Беларусь 2-га (2000), 3-га (2004) і 4-га (2008) скліканняў. Быў намеснікам старшыні Пастаяннай камісіі па адукацыі, культуры, навуцы і навукова-тэхнічным прагрэсе. У 2004–2012 гг. працаваў старшынёй Пастаяннай камісіі Палаты прадстаўнікоў Нацыянальнага сходу Рэспублікі Беларусь па адукацыі, культуры, навуцы і навукова-тэхнічным прагрэсе.
Сваю ролю У. М. Здановіч бачыць ў тым, «каб спрыяць развіццю сістэмы адукацыі і адначасова не дапускаць паспешных крокаў, якія могуць нанесці шкоду школьнікам, студэнтам». Удзельнічаў у распрацоўцы і асабіста абараняў законы Рэспублікі Беларусь: «Аб агульнай сярэдняй адукацыі», «Аб бяспецы і генна-інжынернай дзейнасці», «Аб вышэйшай адукацыі», «Аб правілах беларускай арфаграфіі і пунктуацыі», Кодекс аб адукацыі і інш. 12 красавіка 2013 г. прызначаны дырэктарам Дэпартамента кантролю якасці адукацыі Міністэрства адукацыі Рэспублікі Беларусь. У снежні 2017 г. – начальнікам Галоўнага ўпраўлення кадравай палітыкі і арганізацыйна-аналітычнай работы Міністэрства адукацыі Рэспублікі Беларусь.
Пачынаючы з 2000 г. У.М. Здановіч пастаянна ўдзельнічае ў інтэграцыйных беларуска-расійскіх праектах, галоўным чынам, звязаных з адукацыяй. Два браты Уладзіміра Мацвеевіча жывуць у Расіі на Далёкім Усходзе, таму нармальна і зразумела, што ён не лічыць нашы краіны чужымі, а бачыць жыццё і перспектывы дзвюх дзяржаў, і калі прымае рашэнні, то зыходзіць з іх агульнай карысці.
Узнагароджаны ордэнам Францыска Скарыны (2011), ордэнам «Садружнасць», медалём «90 год Узброеных Сіл Рэспублікі Беларусь», знакам «Выдатнік адукацыі Рэспублікі Беларусь», Ганаровымі граматамі Адміністрацыі Прэзідэнта Рэспублікі Беларусь і Нацыянальнага сходу Рэспублікі Беларусь, Ганаровай граматай Міжпарламенцкай Асамблеі СНД і інш. За умацаванне веры Уладзімір Мацвеевіч узнагароджаны Граматай Патрыяршага Экзарха Мітрапаліта Філарэта.
